तुझ्या स्पर्शांचे शहारे
अजुनही माझ्या देही वाहतात..
मोहाचे ते वारे,
अजुनही मनाला मोहवतात...
वाळवंटातल्या मृगजळासारखे तुझे भास
तू समुद्र असुनही मला व्याकुळ करतात...
माझे शब्द अपुरे पडतात का रे??
की, तुला माझी हाकच ऐकु येत नाही..
वैशाखावणव्यासारखे माझ्या देहाचे आक्रोश,
तुझ्या देहाला त्याची झळही लागत नाही...
जळणं असं की कण कण जळावं लागतं...
राखही होत नाही..
राख झाले असते तर कदाचित कूणी उचलुन
तुझ्यासारख्या पाषाणाच्या
कपाळी फासली असती...
मनात जपुन ठेवलेले तुझे स्पर्श
कधीतरी मी देहावर घेते..
माझी आसवं पुसणारे,
माझे लाड करणारे,
माझ्या केसातुन फिरणारे,
मला सामावून घेणारे..
तुझ्या स्पर्शांचे सारे संभव, सारे आभास,
कधी ह्या सार्या व्यथा सरतील??
तरसलेल्या माझ्या देहावर
तुझ्या स्पर्शांच्या सरी कधी बरसतील???
0 टिप्पणी(ण्या):
टिप्पणी पोस्ट करा